eyeselay
almanacs yearbooks
Thread: Sarfarosh (Hindi)
View Single Post
  #1132  
Old 27th July 2015
xxxdev's Avatar
I Love Mother Nature!
Visit my website
 
Join Date: 6th June 2009
Location: India
Posts: 37,471
Rep Power: 159 Points: 121343
xxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps databasexxxdev has hacked the reps database
Update 77

Ab tak aapne padha
Dusre din subah dono takriban 7 baje uthi.

Ab aage ...

7.30 baje tak dono breakfast kar chuki thi aur aaj ke adventure ke liye bag pack kar rahi thi. Aparijita ne aaj ke liye kuchh special gadgets mangwaaye the.


Drone ka destination set karke Aparijita ne pahle hi use yehi se rawana kar chuki thi. Aaj Aparijita ne apne regular bag ki jagah ek bare camping bag ko taiyar kiya tha jo takriban teen tihai bhara hua tha.


Wo log nikalne hi waale the ki Aparijita ka mobile baj utha. Dusre taraf Ajay Rai the jo video call kar rahe the.


"Good morning, chief uncle !! " Aparijita ne phone uthate hi greet kiya.


"Good moning, bete !! Kya Arpita bhi tumhare saath hai !!"


"Good morning, chief uncle !! Main yahi hoon !!" Arpita ne bhi greet kiya.


Aparijita ne sofe par baithte hue mobile saamne pare table par rakh diya. Arpita bhi uske paas aakar baith gayi.


"Kal raat hi kaabil agents ko promote karne aur naye agents ko sarfarosh me lene ka decision le liya gaya tha aur uske baad ek ghante ke andar hi sabko information bhi de di gayi hai. Tum dono ne apna kaam itni acchi se nibhaya ki mera kaam bahoot asaan ho gaya. Khaskar Aparijita jis tarah se tumne Premnagar ke mission me vyast hote hue bhi kaam ko anzaam diya wo kaabile taarif hai. " Ajay Rai apne dono senior aur sabse bharosemand agents ki taarif kar rahe the.


"Chief uncle, Premnagar waale mission me Arpita aur Arvind ne meri bahoot madad ki nahi to itni jaldi itna kaam nahi ho pata !!"


Aparijita ki awaaz Ajay Rai ke kaano me gunji. Jiske sunate hi Ajay Rai ke hontho par wo muskan aa gayi jo ek pita ko apne baccho ke acche kaam karte dekh kar aati hai. Wo bhali-bhati jaanate the ki Aparijita ne Premnagar me bina kisi ke madad ke waha ho rahi gatividhiyo ko iss tarah se istemaal kar liya ki aaj ke date me Premnagar ka 75% mission pura ho chuka tha. Aparijita jis tarah se apne saathiyo ka hosala-afzai karti thi aur unhe credit deti thi us se uske saath kaam karne waale uski bahut izzat karte the aur apne normal ability se jayda josh aur hosh se kaam karte the. Iske kaaran Aparijita ki team ek eisi fauz me tabdil ho jaati thi jiske karan har mission kamyabi se hi khatam hota tha.


Halaki Arpita Aparijita se Sarfarosh me senior thi par jaise hi usne paaya ki Aparijita us se jayada kaabil hai to uske dil me Aparijita ke liye izzat aur pyar aur bhi badh gaya. Halaki dono ke bich saheliyo wala apnapan aur khulapan tha par jab bhi mission ki baat hoti to wo Aparijita ki baat ko apni baat par tarjeeh deti. Aaj ke date me Aparijita aur Arpita dono Sarfarosh ke eise assets the jinhone unhe diye gaye saare mission ko kamyabi se pura kiya tha aur aaj ke date me sabse bharosemand agents me pahle inka hi naam aata tha. Aaj jaha har chhetra me purso ka bolbala tha waha iss khatarnak kaam me in dono ne eisi jagah banai thi ki koi unpar koi ungli tak nahi utha pata tha.


"Arvind ke under me kuchh agents diye gaye hai jo aaj saam se hi Arvind ko report karenge. Arvind Arpita aur tumhe report karega. Arvind pahle ki tarah tumhe Premnagar waale mission me madad ke liye mauzod rahega. Aasa hai ki 4-5 din ke andar hi hume professional planner ka pata chal jayega. Iske aalaba bhi hum dusre agencies se bhi sampark me hain. Har agency apne taur par alert hai aur kisi bhi tarah ke aatankbaadi hamle se nipatne ki taiyari me lagi hai. Par iss professional ke maidan me aa jane se mamla kucch pechida ho gaya hai aur kuchh pata nahi chal raha hai. Isliye humne naak ghuma kar pakrne ki sochi aur lagta hai ki professional waale matter me hume jald hi safalta mil jayegi. Arpita to sayad aaj aur kal bhi tunhare paas rukne waali hai !! "Ajay Rai ne Aparijita se puccha.


Aparijita ne kaise in gufao ka naksa (map) paya tha aur use waha se kya umeed hai; yeh sab Ajay Rai ko batane lagi jabki Arpita chupchaap sunti rahi. Phir Aparijita ne Arpita ko chunane ki wajah bhi batayi.


"Chief uncle agar pahle gufa me kuchh nahi mila to Arpita kal subah hi yaha se laut jayegi nahi to parso subah wo jaayegi. Is bich hum baaki team se sampark me rahenge !!"


"Ok. Tum dono apna khyal rakhna aur lage ki iss kaam me khatra jayda hai to isse nakxali waala mamla nipatne tak multabi kar dena !! Best of luck, mere bachho !!" Ajay Rai ki sneh bhari awaaz aayi.


"Good bye, uncle !!" Arpita aur Aparijita dono ne greet kiya.


Ajay Rai me ek gair mamuli khubi thi. jaha wo apne agents ko apne baccho ki tarah pyar karte the wahi un par ek sakht prasask ki tarah nazar rakhte the jiske karan koi Sarfarosh ke usolo ko chherne ki kosis nahi karta tha.


Arpita aur Aparijita ne Arvind ko phone kar uske promotion ki badhai di. Arpita phir Arvind se uske duty responsibilty aur baaki baato ke baare me discuss karne lagi. Aparijita ne kucch soch kar phir se Arpita ka laaya suitcase khola aur usme se dibba band khane ki packets nikalne lagi, jo usne mangwaaye to apne dusre adventures ke liye the par sayad aaj hi unhe use karne ka waqt aa gaya tha. Aparijita ne jaldi se apne paas mauzod saaman se kucch cheeje nikal kar pahle pack hiking bag me daale. Jab tak Arpita Arvind se baat khatam karke uske paas pahunchi tab tak Aparijita ek aur hiking bag pack kar chuki thi jo pahle waale se chhoti thi. Arpita ne gaur se bare hiking bag ko dekha jo ab upar tak bhara nazar aa raha tha.

------------------------------------------------------------------------------------

8.30 baje bike par Arpita aur Aparijita us gupt gufao ki aur nikal pari. Aparijita ne bike eise nikali thi ki kisi bhi policewaali ki nazar un par nahi pari.


Dono ne iss waqt cargo ki shirt aur pant pahan rakhi thi. Dono ke shirt ke niche solder holsters se 2-2 revolver chippe hue the. Dono ke pairo me hiking shoes the. Arpita ke peeth par lade bare sa hiking bag ne use puri tarah se picche se chhipa liya tha; yeh bag bike par baithe Arpita ke sar se bhi 6 inch upar jaa raha tha. Aparijita ne apne saamne ek hiking bag baandh rakha tha. Bike ke tanki se bari khubsurti se rassi (climbing rope) baandhi gayi thi.


Aparijita ne kisi ke nazar me aane se bachne ke liye bike ko jungle ke raaste me ghusa diya. Aparijita jungle me bhi bike tej speed me hi maharat se chala rahi thi.


Takriban 20-25 minute ke baad Arpita ke kandhe thapthapane par Aparijita ne bike roki. Bike ke rukte hi Aparijita ko Arpita ke rukne ke isshare ki wajah samjh me aa gayi aur uske chehre par ek payari si muskaan aa gayi.


Aparijita aajkal eise nazare dekh-dekh kar aadi ho chui thi par Arpita ke liye wo ek eisa lamha tha jo bari muskil se zindgi me aata hai.


Kucch dur par hirano ka ek jhund char raha tha jisme bahut saare chhote bacche the jo aapas me apne chhote-chhote sing lara kar masti kar rahe the yaa phir apni maayo ke aage-picche uchhalte hue tedhi-medhi chaal me chal rahe the. Inki ucchal-kud se bekhabar safed khargosho ka ek jhund hari-hari ghaas ko kha raha tha. Unhe dekh kar yun lagta tha jaise kisi ne rui ke gole bana kar unhe ghaas par biccha gaya ho. Paas hi ek chhota sa jharna bah raha tha jis ke aas- paas bahut hi khubsurat jungli phool khile hue the. Hawa udhar se Arpita aur Aparijita ki taraf aa rahi thi jisme un phulo ki manbhawan khusbu basi hui thi.


Jharne ke paas ek morni pucch utha kar kuchh kha rahi thi ki tabhi waha ek mor dikhayi diya. Inke dekhte hi dekhte mor ne morni ko aakarsit karne ke liye naachna suru kar diya.


Arpita ne bike se utarte hi bag bike par rakh diya tha aur apne mobile ke saktisaali camera se snaps utarne me lagi hui thi. Aparijite ne Arpita ko snaps lete dekha to usne bhi apni bag bike ke bagal me rakh diya.


Arpita ne jab morni ki or mor ko aate dekha to usne mobile video recording par laga diya. Wo bilkul dam saadhe prem ki anunay-vinay ke lamhe ko apne mobile me qaid kar rahi thi. Thori der me hi morni ne mor ke pranay nivedan ko accept kar liya aur dono jharne ke picche kanhi gum ho gaye.


Recording khatam hote hi Arpita daur kar Aparijita ki aur badhi aur use baaho me bhar kar chum liya.


"Apu, tere karan aaj prakirti ki god me ek khubsurat nazara dekhne ko mila !!"


"Aru, meri jaan sade naal rahoge to eise hi aish karoge" kahte hue Aparijita ne Arpita ko chum liya.


"Apu !! Aaj to mera bhi man Dilip kumar ki tarah Mukesh ki gaaye gaane ko gaane ka kar raha hai !!" Arpita ne apni baahe failate hue kaha.


"Aru, meri jaan to tujhe ruka kisne hai !! Chal suru ho jaa !!" Aparijita ne Arpita ki gaal ki laali churate hue kaha.


Agle hi pal Arpita ke mithe gale se Mukesh ka amar geet ke bol hawa me mithas gholne laga .



suhaanaa safar aur ye mausam hasi
hame dar hai ham kho na jaae kahi
suhaanaa safar

ye kaun hansataa hai phulo me chhup kar
bahaar bechain hai kisaki dhun par
kahi gumagum, kahi rumajhum, ke jaise naache zami
suhaanaa safar

ye gori nadiyo kaa chalanaa uchhalakar
ke jaise alhad chale pi se milakar
pyaare pyaare ye nazaare nikhare hai har kahi
suhaanaa safar

ho ho ho
vo aasamaan jhuk rahaa hai zami par
ye milan hamane dekhaa yahi par
meri duniyaa, mere sapane, milege shaayad yahi
suhaanaa safar




Arpita jab gaa rahi thi tabhi ek chhota hiran apni masum kajrari aakho se use dekh raha tha. Usne aaj tak eisa swar kanhi nahi suna tha. Usne apni chhoti zindagi me sirf panchhiyo ko gaate suna tha. Wo aascharya chakit sa aur karib se dekhne aur iss nayi awaz ko janane Arpita ki aur khicha chala aa raha tha. Use dekh kar uske do saathi bhi uske picche chal pare the.


Aparijita ne jab unhe apni aur aate dekha to usne apne agal-bagal se hari-hari mulayam ghaas ukhar kar Arpita ki haatho me de diya. Chhota hiran Arpita ke bilkul karib aa kar khara ho gaya to Arpita ne gaate hue ghaas uski aur badhaya jise usne khana suru kar diya. Arpita apne dusre haath se hiarn ko sahla rahi thi.




Tabhi us hiran ki maa waha aati dikh pari jo do pairo waale bagair dum ke jaanwaro ko dekh kar thora khaufzada thi. Gaana khatam hone ke baad bhi Arpita apne nanhe dost ko sahla rahi thi. Chhote hiran ne apni maa ke aankho me jald lautne ka farman padha aur wapas lautne laga; lautate waqt wo ek baar picche ghuma aur ab tak ghutno par baithi Arpita ke gaalo ko chaat kar apna sneh dikhya aur bhaag kar apni maa ki aur chal para. Hiran ki maa ne apne jhund me lautne ke baad naa jane kya bol diya ki saare hiran waha se dusri aur jaane lage.


"Aru, chal chalte hai !!" Aparijita ne Arpita ke kandho ko thapthapte hue kaha.



will continue -->
______________________________
[My story] Sarfarosh
पोंछ कर अश्क़ अपनी आँखों से, मुस्कुराओ तो कोई बात बने ! सर झुकाने से कुछ नहीं होगा, सर उठाओ तो कोई बात बने !!
भेदभाव अपने दिल से, साफ़ कर सके| दोस्तों से भूल हो तो, माफ़ कर सकें|| हम को मन की शक्ति देना, मन विजय करें| दूसरों की जय से पहले, खुद को जय करें ||
खुसरो दरिया प्रेम का, उल्टी वा की धार। जो उतरा सो डूब गया, जो डूबा सो पार।। A drop of honey catches more flies than a gallon of gall. ~ Lincoln

Reply With Quote
Have you seen the announcement yet?
Page generated in 0.04167 seconds